पुणे : महाराष्ट्र कॉस्मॉपॉलिटन एज्युकेशन सोसायटीतर्फे आज (२८ नोव्हेंबर) महात्मा फुले पुण्यतिथीदिनी आझम कॅम्पस ते फुले वाडा अशी अभिवादन मिरवणूक काढली. या मिरवणुकीत अल्पसंख्यांक समाजातील पाच हजार विद्यार्थी आणि शिक्षक सहभागी झाले होते.
संस्थेचे अध्यक्ष डॉ. पी. ए. इनामदार यांनी मिरवणुकीचे उद्घाटन केले. मिरवणुकीचे नेतृत्व संस्थेचे सचिव लतिफ मगदूम यांनी केले. संस्थेच्या कला महाविद्यालयाने सादर केलेला महात्मा ज्योतिबा फुले आणि सावित्रीबाई फुले अनाथ विद्यार्थ्यांना जेवण वाढतानाचा देखावा मिरवणुकीचे विशेष आकर्षण होता. मिरवणुकीदरम्यान विद्यार्थ्यांनी महात्मा फुले यांच्या घोषवाक्यांचे फलक हाती धरले होते. अभिवादन मिरवणूक उपक्रमाचे हे १७ वे वर्ष होते.
दरबार ब्रास बँडची दोन पथके, ढोलताशा, तुतारी-नगारे यांच्या गजरात आझम कॅम्पस येथून मिरवणुकीस प्रारंभ झाला. पूना कॉलेज, गोल्डन ज्युब्ली, टिंबर मार्केट, सावित्रीबाई फुले सांस्कृतिक भवन, बब्बनमियाँ चौक, रिझवानी मशिद, मीठगंज पोलीस चौकी, मोमीनपुरा, चाँदतारा चौकमार्गे घोषणांसह मिरवणूक महात्मा फुले वाडा येथे पोहोचली. ‘एमसीई’चे मगदूम यांच्या हस्ते महात्मा फुले यांच्या प्रतिमेस पुष्पहार घालण्यात आला.
मिरवणुकीत डॉ. शैला बुटवाला, डॉ. रशीद शेख, डॉ. व्ही. एन. जगताप, डॉ. किरण भिसे, डॉ. भूषण पाटील, शाहिद इनामदार, वाहिद बियाबानी, शाहिद शेख, प्रा. इरफान शेख, प्रा. रबाब खान, मुमताज सय्यद, डॉ. आर. गणेसन, अजीम गुडाखूवाला, प्राध्यापक, संस्थेचे पदाधिकारी सहभागी झाले होते.